„Moi Dahliesteckelche“
Ich hann mer e Dahliesteckelche kaaf,
e wunnerschäänes.
In so´ner erd´ne Scherwel drinn,
grad net so e ganz Kläänes.
Mit drei quittegääle Bliete dra(n),
wie e Sterneschtralekranz.
Es war es schäänschte wo ich gefun han,
beim Blummegäärtner Franz.
Ich du´s betuddele wie´s sich gehert,
es soll ihm doch gefalle.
Ich vezehl un pischber als mit ihm,
so ded´s aach rechtlang halle.
Ich duh jeden Daa, mojens un owens,
uf em Gaadedisch no dem Liebche gucke.
Die Frääd an dem Dahliesteckelche,
die macht mich fascht meschugge.
Uf äämol ziehen dicke, dunk´le Wolke uf,
mer heert aach schunn de Dunner.
E schwerer Schdurm mit Rää un Haachel,
reisst es Steckelche vun em Disch e runner.
Die Scherwel in dausend Fetze,
dess Dahlsche, es hat ganz Dalles.
Do leit´s verroppt im Dreck un Batsch,
es war doch – moi Ään un Alles.
Rudolf Ritter
Wir danken Herrn Ritter, dass er uns diesen Text in pfälzischer Mundart zur Verfügung stellte.
Herr Ritter wohnt im Grübentälchen und ist Mitglied im Mundartverein Kaiserslautern e.V.
Der Verein veröffentlichte ein Heft mit dem Titel „Vun Tulwe, Dahlie un annere Blumme“, in dem Vereinsmitglieder verschiedene Texte, Gedichte und Sprüche über Blumen auf pfälzischer Mundart zum besten geben.
Das Heft wurde uns von Herrn Ritter zur Verfügung gestellt – und wer etwas in die pfälzische Mundart eintauchen möchte, kann gerne im Stadtteilbüro darin schmökern.